Oier Gastesik irabazi du Iphone 12a!!!

Ostiralean Tolosako Leidor aretoan egon ginen Orixe BHI eta Laskorain ikastolako ikasleekin dinamikaren bueltako bigarren saioa egiten, eta bertan geundela aprobetxatuta lehenengo erronkako saria banatu genuen. Izan ere, irabazlea publiko artean zegoen, Oier Gastesi (@oierrr65), alegia: “Sarerako formatu ezberdinetan ekoiztutako edukiak aurkeztu ditu lehen erronkan. Meme bat, bikoizketa ariketa bat, podcast bat eta euskal musikari erreferenteak oinarri hartutako ausnarketa bat, besteak beste. Aurkeztutako eduki guztiak izan dira landuak eta kalitatezkoak”, adierazi dute epaimahaiko kideek saria banatzerako orduan.

Ez zen izan, baina, eguneko sari bakarra, Ekaitz (@ekaitzz2)-ek ere saria izango duelako, izan duen jarrera parte-hartzaileagatik: “Higazte!-ra konektatuta izan da uneoro, eta hainbat eduki igo ditu. Memeekin eta bikoizketa bideo laburrekin uneoroko presentzia izan du on-line eta epaimahaiak horixe saritu nahi izan du”. Hori horrela, ekainean gauzatuko den sari banaketa ofizialean jasoko dute saria.

Eta horrekin batera, sorpresaren bat edo beste ere izan zen. Hain zuzen, youtuber-ek horrenbeste erabiltzen duten argi-uztai bat zozketatu zen goizean zehar egindako saio bakoitzean, bertan izan ziren ikasleen artean.

Zozketa eta sari banaketak alde batera utzita, Kai Nakai eta Maialen Sorzabalbere izan ziren ikus-entzunezkoak sortzeko klabeak eskaintzen. Horretaz gain, bertan, zuzenean, bikoizketa ariketa bat egiteko aukera izan zuten eta maiatzaren 22ra bitartean gauzatu beharko duten bigarren erronka ere aurkeztu zieten sortzaile gazteek ikasleei. Kasu horretan, irabazleak Gopro-9a eramango du etxera.